中國式付款「支付寶」(廣東話版)

喺中國除咗用現金比錢，仲可以用支付寶等方式嚟電子支付。 雖然好多地方都歡迎客人用信用咭比錢，但係店舖職員良莠不齊，為咗避開黑店偷取信用咭資料，都係唔用好過。

以下就係一個真人真事。我坐大巴去西藏幫達途中，坐我後面果個人突然收到銀行短訊，話佢成功用信用卡比左二萬幾蚊。佢係車上面佢又點會碌到卡。於是佢咪打比銀行，銀行話數已過，取消唔到。而他唯一可以做嘅嘢就係報警。打電話比110(相等於香港的999)報警，110要佢去就近警局報案。於是佢同佢朋友就係大巴駛到芒康果時落車搵警局報警。行程完全被破壞。我相信果二萬幾蚊係佢地報警後係可以追得返，但係應該都到追返一年半載。為免不必要嘅麻煩，都係用返當地比較流行嘅電子支付算。

去幫達嘅大巴上

中國嘅支付寶戶口其實同我地係香港用淘寶嘅支付寶係同一個戶口。所以如果用開淘寶網嘅人唔會對佢陌生。 但是要係中國使用支付寶，你一定要有一個中國大陸嘅銀行戶口，而且要將張銀行咭同支付寶帳戶綁定。係以後嘅文章會講講點係中國大陸開銀行戶口。綁定銀行卡後你嘅支付寶會有1000元終身可用額度。即係成世人先得果一千元用。咁點會夠用。要更多嘅額度就要被迫「實名制」。實名制都算係簡單，只要係支付寶個App上填表同上載你個回鄉咭圖片比佢，再等大約一到幾日時間就可以。實名後一年嘅支付額度可達二十萬蚊，對於去大陸玩嘅人來講應該夠用。

可以用支付寶嘅自動售賣機

支付寶係中國大陸可以用來網上支付，例如火車票，酒店旅館房費，仲可以係好多自動售賣機買嘢。只要用手機上部相機掃下個售賣機顯示果個QR Code，再係支付寶個App上確定就可以完成付款。對於係紙幣似梅菜的大陸嚟講，用支付寶比起用梅菜紙幣方便得多。仲有唔少舖頭都支援支付寶比錢，就好似我地係香港用八達通卡一樣，用部手機掃下個佢個QR Code就比到錢，但係點都係無八達通咁方便。

用嚟比火車飛錢

支付寶App介面