中國大陸手機電話號碼(廣東話版)

去中國大陸玩，有一個大陸電話號碼當然會方便好多。你可以用大陸電話號碼嚟申請大陸銀行戶口、手機銀行 、開通買火車飛的12306火車官方App 、開通支付寶實名制 、開通用來訂酒店旅館的「去哪」App或者用來申請微信(WeChat)等等。以後的文章會再講講開通呢啲服務有乜用。

好多人諗起大陸電話就會諗起一咭兩號。但喺香港啲一咭兩號預付咭早喺2016年4月尾已經停售。由於「實名制」關係，而家喺深水埗都買唔到大陸電話卡。對香港人來講而家開咭最方便就係喺深圳羅湖關口出口，同果啲喺地鐵站/火車站出口有蓋建築物內(即係羅湖地鐵樞紐大廳，就係好多走水貨交奶粉, 益力多,朱古力等等果度)攤檔買。

羅湖地鐵樞紐大廳，可以係度搵攤檔買電話卡。

預付電話卡的價錢一般係一百元人民幣有找(2016/17年物價)。檔主有機會要你提供港澳居民來往內地通行證，即回鄉卡，掃瞄入電腦來實名制。除左回鄉卡外，你唔好比其他身份証明文件比佢。講到呢度你可能諗，比張回鄉卡佢地安唔安全。我可以話比你聽，係大陸旅遊，你個回鄉卡號碼根本就唔係乜嘢私隱。好多地方都會用到，包括入住酒店賓館。所以唔好因為有人噏得出你個名同證件號碼就意為對方係乜官員乜乜。因為呢啲資料喺中國有錢就買到。其實都有啲檔口係唔洗你比回鄉卡，因為佢地貪方便用自己啲資料同賣比你果張電話卡實名制左。

呢個年代係大陸機本上都無哂0月費嘅預付咭，而家中國聯通嘅預付卡月費14元一個月左右。你又或者可以去中國移動或中國聯通嘅分店上台。由於個電話號碼可能同你係大陸嘅服務綁定左，所以如果你仲要用果啲服務，你可能仲係要幫個電話號碼定時增值，養著個電話號碼。